Në Gjykatën Themelore në Prishtinë ka dështuar mbajtja e seancës dëgjimore ndaj këngëtarit Besart Kelmendi, i njohur si Gjesti, i cili akuzohet për tri vepra penale: armëmbajtje pa leje, kanosje dhe dëmtim të pasurisë. Shkak i dështimit të seancës ishte mungesa e të akuzuarit, i cili përmes avokatit njoftoi se nuk mund të ishte prezent për shkak të një koncerti në Shqipëri. Gjykata paralajmëroi se në rast të mungesës së tij në seancën e radhës, do të lëshojë urdhëresë për sjellje me detyrim. Më herët, Gjesti kishte arritur marrëveshje për pranim fajësie me Prokurorinë dhe i ishte ndërprerë masa e paraburgimit, ndërsa ngjarja lidhet me një mosmarrëveshje për borxh pranë studios “Onima”.