Aktori i mirënjohur Zhani Ziçishti u nda nga jeta në moshën 85-vjeçare, duke lënë pas një karrierë të gjatë dhe të suksesshme në skenën dhe kinemanë shqiptare. Ai interpretoi me mjeshtëri mbi 16 role në filma artistikë, duke filluar me rolin e mësues Agronit në filmin “Lumë drite” në vitin 1970. Ziçishti ishte një figurë e dashur për publikun, veçanërisht për qytetin e Korçës, ku u ngjit me mijëra herë në skenë në Teatrin ‘Andon Zako Çajupi’. Homazhet për aktorin do të zhvillohen më 26 shkurt në hollin e teatrit, nga ora 09:30 deri në 10:30.