Në Klinikën e Kirurgjisë Vaskulare të Qendrës Klinike Universitare të Kosovës u realizua me sukses një ndërhyrje komplekse tek një paciente 71-vjeçare me aneurizmë të arteries splenike, e cila kishte dimension rreth 7 cm dhe rrezikonte rupturë dhe gjakderdhje fatale. Pas diagnostikimit me angiografi CT, ekipi multidisiplinar vendosi për trajtim kirurgjikal të hapur, duke kryer aneurizmektominë dhe rekonstruksionin vaskular me anastomozë termino-terminale, që mundësoi ruajtjen e splenit dhe funksionit të tij imunologjik dhe hematologjik. Ndërhyrja u shoqërua me sfida anesteziologjike dhe pulmonare, të cilat u menaxhuan me sukses nga stafi i specializuar i anesteziologjisë dhe kujdesit intensiv. Pacientja u monitorua intensivisht për 48 orë dhe u lirua pas 7 ditësh në gjendje të mirë shëndetësore, duke reflektuar profesionalizmin dhe bashkëpunimin e stafit multidisiplinar të QKUK-së në trajtimin e rasteve komplekse kirurgjikale.