Seanca gjyqësore në Hagë ndaj Hashim Thaçit, Bashkim Smakajt, Fadil Fazliut dhe Hajredin Kuçit u ndërpre përkohësisht për shkak të mungesës së avokatit të Fazliut, David Young. Gjyqtari Christoph Gosnell kërkoi nga anëtarët e ekipit mbrojtës që të kontaktojnë me Young dhe të qëndrojnë pranë sallës së gjyqit për rifillimin e seancës sa më shpejt. Hashim Thaçi ndoqi seancën përmes video-lidhjes, ndërsa të tjerët ishin fizikisht në sallë. Në vijim të seancës pritet dëshmia e Christopher Kelly, hetues forenzik digjital, i cili ka dhënë informacion mbi ekzaminimet e telefonave të të akuzuarve dhe dëshmitarëve në këtë proces për pengim të drejtësisë.