Një 25-vjeçar nga Prishtina është ndaluar nën dyshimin për “deklarim të rremë nën betim” pas një seance gjyqësore të mbajtur të martën. Ai dyshohet se ka dhënë një deklaratë të ndryshme në gjykatë nga ajo që kishte dhënë më parë në polici, duke ngritur dyshime për mospërputhje në fakte. Prokurori ka kërkuar ndërhyrjen e policisë dhe ka urdhëruar nisjen e hetimeve, ndërsa i dyshuari është intervistuar në prani të avokatit mbrojtës dhe është dërguar në mbajtje për 48 orë në Qendrën e Mbajtjes. Hetimet lidhur me këtë rast janë ende në zhvillim e sipër, ndërsa personi konsiderohet i pafajshëm deri në vendim të formës së prerë nga gjykata.