Gjykata Themelore në Pejë do të shpallë nesër aktgjykimin për rastin e vrasjes së trefishtë në Gllogjan, ngjarje kjo që ndodhi më 26 nëntor 2021 gjatë një sulmi ndaj një autobusi. Të akuzuar për këtë krim janë Halil Mehmetaj, Kastriot Mehmetaj dhe Kreshnik Mehmetaj, të cilët përballen me akuza për vrasje të trefishtë. Si pasojë e sulmit humbën jetën shoferi i autobusit dhe dy nxënës 17-vjeçarë, ndërsa një pasagjer tjetër mbeti i plagosur. Prokuroria ka kërkuar dënimin me burgim të përjetshëm për tre të akuzuarit, duke argumentuar se provat e paraqitura gjatë gjykimit tregojnë përfshirjen e tyre në këtë krim, ndërsa pala e dëmtuar mbështet këtë kërkesë. Shpallja e vendimit do të bëhet nesër në orën 14:30.