Klinika e Neurokirurgjisë në Qendrën Klinike Universitare të Kosovës ka realizuar për herë të parë dy operacione me teknikën moderne dhe minimalisht invazive të neuroendoskopisë. Operacionet u kryen më 6 dhe 7 korrik në bashkëpunim me neurokirurgun gjerman dr. Gousias Konstantinos, duke përfshirë heqjen e tumoreve në hipofizë dhe ventrikulin e tretë të trurit. Gjatë ndërhyrjeve u përdor edhe neuronavigatori, një pajisje që rrit precizionin dhe sigurinë e operacioneve, ndërsa pacientët janë në gjendje të mirë shëndetësore dhe në proces rikuperimi. Përveç suksesit klinik, vizita pati rëndësi edhe profesionale, duke mundësuar trajnim praktik dhe përfitim njohurish për stafin mjekësor të Klinikës së Neurokirurgjisë.