Në Spitalin e Përgjithshëm “Dr. Sami Haxhibeqiri” në Mitrovicë ka nisur për herë të parë procesi i skriningut neonatal, një test i rëndësishëm për diagnostikimin e hershëm të sëmundjeve metabolike dhe gjenetike te foshnjat e porsalindura. Ky test realizohet përmes marrjes së disa pikave të gjakut nga pjesa e thembrës së foshnjës, menjëherë pas lindjes, dhe aktualisht përfshin sëmundje si fenilketonuria, hipotireoza, fibrozë cistike dhe galaktozemi. Skriningu neonatal ka nisur më parë në Klinikën e Neonatologjisë në QKUK në Prishtinë, ku deri tani janë realizuar afro dy mijë teste dhe janë identifikuar raste pozitive, duke mundësuar trajtim të hershëm dhe parandalim të komplikimeve. Ky proces pritet të zgjerohet edhe në spitalet e tjera rajonale dhe private, duke përmirësuar ndjeshëm kujdesin shëndetësor për foshnjat në Kosovë.