Gjykata Themelore në Prishtinë ka caktuar masën e paraburgimit prej një muaji për katër serbët e arrestuar për krime lufte kundër popullatës civile në Skenderaj. Një i pandehur tjetër, N.T., është liruar pasi që nuk janë vërtetuar dyshimet për përfshirjen e tij në këto vepra penale. Gjykata ka argumentuar se paraburgimi është i nevojshëm për të parandaluar rrezikun e arratisjes, pasi të pandehurit posedojnë pasaporta serbe dhe mund të largohen nga Kosova, si dhe për të shmangur ndikimin tek dëshmitarët dhe të dëmtuarit. Palët e pakënaqura kanë të drejtë të ankohen në Gjykatën e Apelit për këtë vendim.