Prokuroria Themelore në Gjakovë ka kërkuar dhe Gjykata Themelore ka caktuar masën e paraburgimit prej një muaji ndaj Nexhdet Zymberajt, i dyshuar për vrasjen e rëndë të R.B. dhe plagosjen e E.M. Ngjarja ka ndodhur më 16 mars në orët e para të mëngjesit në një lokal në rrugën “Vëllezërit Frashëri” në Gjakovë, pas një mosmarrëveshjeje mes palëve. Sipas Prokurorisë, i dyshuari ka shtënë disa herë me armë zjarri pistoletë TT në drejtim të viktimës, e cila ka ndërruar jetë në vendngjarje, ndërsa E.M. është plagosur dhe është dërguar për trajtim në spital. I dyshuari është larguar nga vendi i ngjarjes, por më pas është ndaluar dhe tani mbahet në paraburgim për veprat penale “vrasje e rëndë” dhe “mbajtje në pronësi, kontroll ose posedim të paautorizuar të armëve”. Palët kanë të drejtë ankese ndaj këtij vendimi në Gjykatën e Apelit të Kosovës.