Gjykata Themelore në Prishtinë ka caktuar masën e paraburgimit prej një muaji ndaj tre të dyshuarve, S.D., B.K. dhe A.A., të arrestuar në kuadër të operacionit “Mega”. Ata akuzohen për pjesëmarrje dhe organizim të grupit kriminal, shpëlarje parash, financim të terrorizmit, si dhe për veprat penale që lidhen me armë dhe narkotikë të paautorizuara. Gjykata ka argumentuar se ekziston rreziku real që të pandehurit të arratisen, të përsërisin veprat penale dhe të ndikojnë në dëshmitarë nëse lirohen. Masa e paraburgimit është konsideruar e nevojshme për të siguruar rrjedhën e pandërprerë të procedurës penale, ndërsa palët kanë të drejtë ankese në Gjykatën e Apelit.