Në orët e para të së enjtes në magjistralen Prishtinë-Mitrovicë ndodhi një aksident tragjik ku një grua 52-vjeçare humbi jetën, ndërsa pesë persona të tjerë u lënduan rëndë. Policia arrestoi një person i cili dyshohet se ka vozitur në gjendje të dehur në shiritin e kundërt të rrugës, duke shkaktuar aksidentin fatal. Ky është aksidenti i tretë me fatalitet brenda kësaj jave, ndërsa statistikat tregojnë se në Kosovë gjatë gjysmës së parë të vitit janë regjistruar mbi 10 mijë aksidente, me 46 viktima dhe mbi 7,400 të lënduar. Eksperti i komunikacionit Muhamed Krasniqi thekson se një në tre vdekje në vend vjen si pasojë e aksidenteve rrugore dhe kërkon edukim të hershëm në trafik si masë parandaluese, ndërsa Policia e Kosovës po shton masat ndëshkuese për të ulur numrin e aksidenteve.