Mbi 130 nxënës të shkollës fillore të mesme të ulët në fshatin Lismir të Fushë-Kosovës nuk kanë filluar vitin e ri shkollor për shkak të bojkotit të mësimit nga prindërit. Ata kanë marrë këtë vendim pasi kanë konstatuar kushtet e papërshtatshme në shkollë, të cilat ishin evidentuar edhe nga Inspektorati Sanitar në qershor, duke përfshirë probleme me tualetet, lagështinë dhe mykun në mure. Këshilli i Prindërve ka kërkuar rinovimin e objektit, por deri tani komuna nuk ka ofruar ndonjë zgjidhje konkrete për rikonstruksion apo zhvendosje të procesit mësimor. Drejtori i Arsimit në Fushë-Kosovë ka deklaruar se nuk do të bëhet renovimi i shkollës, por nxënësit do të transferohen në gjimnazin “Hivzi Sulejmani”, ndërsa komuna është duke diskutuar me prindërit për mënyrën më të mirë të organizimit të mësimit dhe mbulimin e shpenzimeve të udhëtimit.