Oda e Inxhinierëve të Kosovës ka reaguar pas shembjes së rrugës në gropat ndërtimore, duke theksuar se kjo ngjarje është pasojë e moszbatimit të plotë të ligjit nga institucionet përgjegjëse. Sipas Odës, Ligji për Odat e Arkitektëve dhe Inxhinierëve në Fushën e Ndërtimit kërkon që punimet të kryhen vetëm nga inxhinierë të licencuar dhe brenda kompetencave të përcaktuara, për të garantuar sigurinë publike, por në praktikë ky ligj nuk respektohet. Kontrolli mbi zbatimin e licencave dhe përgjegjësive profesionale është i pamjaftueshëm, duke lejuar devijime nga standardet ligjore, gjë që rrezikon jetën dhe pronën e qytetarëve dhe shkakton dëme ekonomike. Oda i bën thirrje institucioneve që të zbatojnë ligjin pa kompromis, të sigurojnë që çdo projekt të realizohet nga profesionistë të licencuar dhe të forcojnë mekanizmat e kontrollit dhe inspektimit për të parandaluar rreziqet ndaj sigurisë publike.