Një aksion i gjerë i Krimeve Ekonomike dhe Prokurorisë Speciale u zhvillua mëngjesin e sotëm në Prishtinë, Fushë Kosovë dhe Obiliq, ku u arrestuan disa persona nën dyshimet për korrupsion, ryshfet dhe manipulime me shpronësime të paligjshme të tokave. Në mesin e të arrestuarve është ish-kandidati për kryetar të Prishtinës, Vegim Gashi, dhe bashkëpunëtori i tij Nexhat Raifi, të cilët dyshohen për dhënie ryshfeti. Po ashtu, u arrestua edhe Avdi Pireva, ish-kandidat për deputet i Lidhjes Demokratike të Kosovës, dhe Nexhmije Karaqi, zyrtare e Avokaturës Shtetërore, e përfshirë në këtë rrjet korrupsioni. Gjatë aksionit u sekuestruan pajisje teknologjike, para të gatshme dhe dokumentacion i ndryshëm, ndërsa ky rast lidhet me një operacion të mëparshëm në dhjetor të vitit të kaluar, ku u arrestuan shtatë persona të tjerë, përfshirë ish-ministrin Fadil Ismajli, mik dhe ish-punëdhënës i Vegim Gashit.