Policia e Pukës ka finalizuar operacionin e koduar “Arsti”, duke zbuluar dhe goditur një rast të kultivimit të bimëve narkotike Cannabis Sativa në fshatin Arst. Gjatë këtij aksioni u sekuestruan dhe u asgjësuan 130 bimë të dyshuara narkotike, ndërsa u arrestua shtetasi 55-vjeçar S. N., i dyshuar si autori i kultivimit. Përveç tij, është proceduar penalisht në gjendje të lirë edhe kryeplaku i fshatit, M. K., 60 vjeç, për veprën penale “Shpërdorimi i detyrës”. Kontrollet në territorin e qarkut Shkodër do të vazhdojnë me qëllim parandalimin dhe goditjen e rasteve të kultivimit të bimëve narkotike, ndërsa materialet procedurale janë referuar Prokurorisë për veprime të mëtejshme.