Policia e Shtetit në Shqipëri finalizoi operacionin ndërkombëtar të koduar “Fury”, në bashkëpunim me partnerët amerikanë dhe autoritetet e Maqedonisë së Veriut, duke arrestuar në Durrës dy persona me rrezikshmëri të lartë shoqërore. Të arrestuarit, M. Xh., 26 vjeç nga Shkupi, dhe S. N., 34 vjeç nga Norvegjia, ishin në kërkim ndërkombëtar nga INTERPOL për akuza që përfshijnë vrasje, plagosje, armëmbajtje pa leje dhe pjesëmarrje në organizatë kriminale. Gjatë kontrollit u gjetën dokumente identifikimi të dyshuara të falsifikuara, të cilat dyshohet se janë përdorur për t’u larguar nga Maqedonia e Veriut dhe për t’iu shmangur drejtësisë. Në vijim të operacionit u arrestua edhe një person tjetër, Xh. R., 26 vjeç, i dyshuar për falsifikim dokumentesh dhe përkrahje të autorëve të krimit, ndërsa në banesën e tij u sekuestrua edhe një sasi e vogël lënde narkotike. Autoritetet shqiptare vlerësuan bashkëpunimin ndërkombëtar si kyç për suksesin e këtij operacioni.