Mëngjesin e së premtes, në zonën kufitare mes Maqedonisë së Veriut dhe Kosovës, policia ka goditur një rast kontrabande mallrash duke arrestuar një person nga Shkupi dhe duke sekuestruar dy automjete transportuese. Ngjarja ndodhi rreth orës 08:00, kur policët vërejtën transferimin e mallrave midis një automjeti me targa të Kosovës dhe një tjetër me targa të Shkupit në vijën kufitare mes fshatrave Tanushë dhe Mjak. Gjatë ndërhyrjes, drejtuesi i automjetit me targa të Kosovës u largua, por policia e Kosovës ndërmori masa për ndalimin e tij, duke e detyruar të dilte nga rruga. Të dy automjetet janë sekuestruar për procedura të mëtejshme, ndërsa prokuroria është njoftuar dhe pritet kallëzimi pas hetimeve të plota.