Policia e Lezhës, në bashkëpunim me Forcat e Ndërhyrjes së Shpejtë të Tiranës dhe Prokurorinë e Lezhës, finalizoi operacionin e koduar “Perimetri 2”, duke arrestuar 7 persona të dyshuar për shpërndarje të lëndës narkotike Cannabis Sativa në qytetin e Laçit, përfshirë zona pranë shkollave. Gjatë hetimeve disa mujore me metoda speciale, u dokumentua aktiviteti kriminal i grupit që ndante dhe shiste drogë në doza, si dhe u zbulua një lokal ku organizoheshin lojëra fati në kundërshtim me ligjin. Pronari i lokalit, babai i dy prej të arrestuarve, u ndalua për mosregjistrim të subjektit dhe punonjësve në organet përkatëse. Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Lezhë për veprime të mëtejshme.