Policia e Vlorës finalizoi operacionin e koduar “WEST”, duke arrestuar në flagrancë pesë persona, përfshirë dy shtetas italianë, të dyshuar për shpërndarje droge në zonat turistike të qytetit. Gjatë kontrollit u sekuestruan rreth 700 doza të lëndëve narkotike të ndryshme si “Tusi”, “Ketaminë”, “MDMA”, “Kokainë”, “Ekstazi” dhe “Kanabis”, si dhe një shumë parash dhe 8 aparate celularë. Arrestimet u kryen në zonën e Zvërnecit dhe në banesat në lagjen “Uji i Ftohtë”, ndërsa hetimet paraprake tregojnë se droga shitej në plazhe dhe lokale gjatë sezonit turistik. Materialet iu referuan Prokurorisë për veprime të mëtejshme lidhur me veprën penale “Prodhimi dhe shitja e narkotikëve” në bashkëpunim.