Një pallat 12-katësh në Tiranë është konfiskuar për interes publik pas një aksioni të përbashkët të Policisë së Shtetit dhe Inspektoratit të Mbrojtjes së Territorit. Verifikimet treguan se katet e 10-të, 11-të dhe një pjesë e katit të 12-të ishin ndërtuar pa leje, duke tejkaluar lejen e ndërtimit të një godine 9-katëshe. Gjithashtu, objekti ishte vënë në shfrytëzim pa certifikatë përdorimi, duke shkelur ligjin në fuqi. Materialet procedurale janë referuar në Prokurori për veprime të mëtejshme, ndërsa Policia e Shtetit thekson angazhimin e saj për parandalimin dhe goditjen e ndërtimeve të paligjshme dhe krimeve kundër mjedisit.