Prokuroria Publike ka kërkuar paraburgim prej 30 ditësh për tre persona të dyshuar lidhur me ndotjen e ujit të pijshëm në sistemin e ujësjellësit të Gostivarit. Tre të dyshuarit, përfshirë ushtruese detyre drejtoreshë të NP “Komunalec” – Gostivar, udhëheqës teknik dhe përgjegjësin e departamentit për ujësjellës, u paraqitën para gjykatës së procedurës paraprake. Ata dyshohen për veprën penale “vepra të rënda kundër mjedisit jetësor dhe natyrës”, për shkak të ndotjes së ujit të pijshëm. Hetimet janë në vazhdim dhe masa e paraburgimit synon të sigurojë procesin gjyqësor dhe të parandalojë ndikimin në hetim.