Gjykata Themelore në Mitrovicë ka vendosur të vazhdojë për 30 ditë masën e paraburgimit ndaj V.M., ish-pjesëtar i Ministrisë së Punëve të Brendshme të Serbisë, i dyshuar për kidnapimin dhe plagosjen e Milan Vukashinoviqit më 1 nëntor 2025 në Leposaviq. V.M. është arrestuar në Leshak në një operacion të përbashkët të Policisë së Kosovës dhe Agjencisë së Kosovës për Inteligjencë, pasi dyshohet se ka bashkëpunuar me strukturat e sigurisë së Serbisë dhe ka mbështetur veprime të paligjshme, përfshirë rastin e rrëmbimit. Gjatë bastisjes së shtëpisë së tij janë sekuestruar telefona, laptop, dokumente, armë dhe municione, që lidhen me aktivitetet e dyshuara. Ministri i Punëve të Brendshme, Xhelal Sveçla, ka theksuar se Vukashinoviq dyshohet të ketë pasur lidhje me strukturat ushtarake dhe të inteligjencës serbe, duke përgatitur edhe trajnime për të rinjtë serbë dhe duke qenë i përfshirë në përgatitjet e sulmit terrorist në Banjskë.