Gjykata Themelore e Prishtinës ka caktuar një muaj paraburgim për Skender Llugiqin, i dyshuar për kërcënimin ndaj ish-kryeministrit Ramush Haradinaj dhe për veprat penale të kanosjes dhe nxitjes së përçarjes. Vendimi u mor me arsyetimin se ekziston një rrezik real që Llugiqi mund të arratiset nëse lihet në liri, duke shmangur përgjegjësinë penale dhe penguar zhvillimin e procedurës. Kërcënimi ndaj Haradinajt u bë gjatë një aktiviteti në sallën e Kuvendit të Kosovës, ku Llugiqi bëri thirrje për pushkatimin e tij. Gjykata e konsideroi paraburgimin si masën më adekuate për të siguruar praninë e tij dhe për të garantuar rrjedhën e drejtë të hetimeve.