Sot rreth orës 12:30, zyrtarët korrektues të Qendrës Korrektuese të Dubravës kanë parandaluar futjen e një sasie të dyshuar narkotike brenda institucionit. Gjatë kontrollit të gjësendeve të sjella nga një vizitor, është gjetur një pako me rreth 43 gramë substancë të dyshuar narkotike, e kamufluar në qese najloni. Pas zbulimit, vizita është ndërprerë dhe vizitori është ndaluar në sallën e vizitave deri në ardhjen e Policisë së Kosovës, e cila ka marrë në posedim substancën dhe ka nisur procedurat ligjore. Shërbimi Korrektues i Kosovës ka njoftuar se do të vazhdojë me masa të rrepta sigurie dhe kontrolle rigoroze për të parandaluar çdo përpjekje të paligjshme për futjen e materialeve të ndaluara në institucionet korrektuese.