Zyra Kombëtare e Auditimit ka publikuar raportin për vitin 2025 të Ministrisë së Punëve të Brendshme, ku evidentohen parregullsi të shumta në menaxhimin financiar dhe administrimin e personelit. Janë zbuluar mbi 12.5 milionë euro pagesa të klasifikuara gabimisht në kategori ekonomike, përfshirë pagesa të paguara si investime kapitale, mallra dhe shërbime, si dhe subvencione, megjithëse shumica lidhen me paga dhe detyrime të ngjashme. Raporti thekson gjithashtu se 19 zyrtarë të suspenduar kanë vazhduar të marrin shtesa për kushte specifike pune, edhe pse nuk ushtrojnë detyrat përkatëse, dhe 19 punonjës kanë përfituar paga pa vijueshmëri në punë për shkak të një procesi administrativ të pazgjidhur. Auditorët kanë vënë në dukje mangësi në menaxhimin e kontratave, kontrollin e brendshëm dhe zbatimin e legjislacionit financiar, duke rekomanduar përmirësime dhe forcim të mekanizmave të kontrollit, ndërsa menaxhmenti i MPB-së ka pranuar gjetjet dhe ka premtuar veprime për adresimin e tyre.