Sot u shënua 27-vjetori i rënies heroike të dëshmorit të kombit, Milazim Mavraj, i njohur me nofkën “Çeçeni”. Në ceremoninë përkujtimore morën pjesë familjarë, zyrtarë komunalë, veteranë dhe qytetarë, ndërsa nënkryetari i Komunës së Istogut dhe kryetari i Komunës së Klinës, Zenun Elezaj, nderuan me homazhe jetën dhe veprën e tij. Elezaj e përshkroi Mavrajn si një atdhetar të pashoq, i cili u flijua më 28 prill 1999 në Betejën e Koshares, një nga betejat më të ashpra të luftës për liri. Milazim Mavraj u dallua për guxim, vendosmëri dhe sakrificë, duke u kthyer nga Gjermania për të luftuar për atdheun e tij dhe duke mbetur një simbol i përjetshëm i trimërisë dhe dashurisë për Kosovën.