Më 10 gusht 2026, rreth orës 00:15, në rrugën “12 Qershori” në Ferizaj, pranë kafeneve “Dritare” dhe “0290”, ndodhi një përleshje e dhunshme mes katër personave, e cila përfundoi me plagosje të rëndë trupore. Prokuroria Themelore në Ferizaj ka kërkuar paraburgimin e katër të dyshuarve, të identifikuar me inicialet O.A., D.A., A.A. dhe A.N., për veprat penale “Vrasja në tentativë”, “Lëndimi i rëndë trupor” dhe “Pjesëmarrja në rrahje”. Sipas hetimeve, O.A. dyshohet se ka sulmuar të dëmtuarin Sh.A. tri herë në qafë me një kaçavidë, duke i shkaktuar lëndime serioze që kërkuan trajtim në Qendrën Emergjente të Ferizajt dhe më pas në QKUK në Prishtinë. Gjithashtu, O.A. dyshohet të ketë goditur me kaçavidë edhe të dëmtuarin tjetër, A.N., në krahun e majtë dhe kokë, ndërsa D.A., A.A. dhe A.N. akuzohen për pjesëmarrje në rrahje që rezultoi në lëndime të rënda trupore.