Një konflikt i dhunshëm ka ndodhur në burgun e sigurisë së lartë në Fier, ku dy të burgosur janë plagosur gjatë një sherri në dhomën e ajrimit. Sipas burimeve, të plagosurit janë goditur me mjete të improvizuara, përfshirë edhe brisqe rroje, ndërsa forcat e sigurisë kanë ndërhyrë menjëherë për të neutralizuar situatën dhe për t’i rikthyer në qeli. Dy të plagosurit janë dërguar me urgjencë në Spitalin Rajonal të Fierit, ku gjendja e tyre shëndetësore raportohet e qëndrueshme dhe jashtë rrezikut për jetën. Ende nuk janë bërë të ditura rrethanat e plota të konfliktit, emrat e të përfshirëve apo masat që do të merren nga drejtoria e burgut.