Një përleshje mes shtatë personave ka ndodhur të shtunën mbrëma në Gjakovë, rreth orës 22:05, pas një mosmarrëveshjeje që u shndërrua në konflikt fizik. Policia ka ndërhyrë në vendin e ngjarjes, ku ka sekuestruar një armë të shkurtër, një karikator, një fishek dhe katër gëzhoja, duke arrestuar të gjithë të përfshirët. Pas marrjes në pyetje nga prokurori, gjashtë prej tyre janë dërguar në mbajtje, ndërsa një person është liruar në procedurë të rregullt. Të dyshuarit kanë marrë trajtim mjekësor, ndërsa hetimet për armëmbajtje pa leje dhe shkaktim të rrezikut të përgjithshëm vazhdojnë.