Mëngjesin e së hënës në autostradën Lushnje-Rrogozhinë, në afërsi të fshatit Zham Sektor, një 75-vjeçare u përplas rëndë nga një fuoristradë teksa po kalonte rrugën për të shkuar drejt tokave bujqësore. Aksidenti ndodhi kur e moshuara kaloi mbi trafikndarësen, rreth 50 metra larg një mbikalimi, duke u goditur nga automjeti që lëvizte në autostradë. Pas përplasjes, ajo u dërgua me urgjencë në Spitalin e Lushnjës, ku ndodhet në gjendje kritike dhe po merr trajtim në repartin e kujdesit intensiv. Policia rrugore ka nisur hetimet dhe ka shoqëruar drejtuesin e fuoristradës për veprime procedurale, ndërsa shkaqet e aksidentit po sqarohen nga grupi hetimor.