Më 11 gusht në Pestovë të Vushtrrisë, gjatë një operacioni të Njësisë së Antidrogës, një polic u godit nga një veturë që nuk pranoi të ndalej. Në përpjekje për të ndaluar automjetin e dyshuar, drejtuesi i tij iu vërsul policit dhe e goditi me veturë, duke detyruar zyrtarin të përdorte armën në vetëmbrojtje. Nga të shtënat nuk pati të lënduar, por polici mori trajtim mjekësor për plagët e marra. Tre persona, përfshirë edhe drejtuesin e veturës, Leotrim Behrami, u arrestuan dhe po hetohen nën akuzën e sulmit ndaj personit zyrtar, pas rikualifikimit të rastit nga prokuroria.