Policia e Kosovës në Rajonin e Gjilanit organizoi një takim koordinues me Komitetin Lokal për Siguri në Bashkësi të Pogragjës, me fokus parandalimin e abuzimit me narkotikë dhe mbrojtjen nga zjarret. Gjatë takimit u diskutua për gjendjen e sigurisë në fshat dhe u prezantua Plani i Veprimit "Stop drogave 2026", që synon rritjen e ndërgjegjësimit të komunitetit, veçanërisht të të rinjve, për rreziqet e përdorimit të narkotikëve. Po ashtu, u trajtua projekti "Bashkësi e sigurt pa zjarre", i cili ka për qëllim sensibilizimin për parandalimin e zjarreve në hapësira të hapura dhe mbrojtjen e mjedisit, duke informuar për pasojat dhe sanksionet ligjore ndaj shkaktarëve. Policia falënderoi Komitetin Lokal për bashkëpunimin e vazhdueshëm dhe theksoi rëndësinë e partneritetit me strukturat lokale për forcimin e sigurisë dhe krijimin e një ambienti më të qetë për banorët e Pogragjës.