Një zyrtar policor nga Stacioni Policor në Shtërpcë, Edison Limani, është arrestuar në flagrancë më 16 prill nga Inspektorati Policor i Kosovës në bashkëpunim me Prokurorinë Themelore në Ferizaj. Ai dyshohet se ka pranuar 2,000 euro në lidhje me veprën penale të organizimit të skemave piramidale dhe bixhozit të paligjshëm. Arrestimi u realizua gjatë një operacioni hetimor me masa të fshehta, përfshirë simulimin e korrupsionit, duke kapur në flagrancë zyrtarin policor. Pas arrestimit, me vendim të prokurorit, ai është dërguar në ndalim për 48 orë, ndërsa hetimet për zbardhjen e plotë të rrethanave vazhdojnë.