Policia e Kosovës zhvilloi një operacion të gjerë në gjashtë lokacione të ndryshme në komunën e Zubin Potokut, konkretisht në fshatrat Banovë dhe Prevllak, ku sekuestruan armë, municion dhe pajisje ilegale. Në lokacione të ndryshme, përfshirë shtëpi të pabanuara dhe një hambar, u gjetën pushkë të ndryshme, armë automatike AK-47, granatë dore M75, fishekë, radio lidhje, kamera, uniforma ushtarake dhe pajisje për pastrimin e armëve. Një person me inicialet M.R. u shoqërua për intervistim lidhur me armëmbajtje pa leje, por u lirua me urdhër të prokurorit, ndërsa hetimet vazhdojnë. Veprimet policore u koordinuan me prokurorinë dhe njësitë për trajtimin e mjeteve shpërthyese (EOD) intervenuan për të tërhequr në mënyrë të sigurt granatën e gjetur në një prej lokacioneve.