Policia e Kosovës ka reaguar fuqishëm ndaj një videoje të publikuar nga portali VOX Kosova, ku shfaqeshin pamje të kampit të Njësive Speciale “Enver Zymeri”, duke i cilësuar ato si të manipuluara dhe të papërputhshme me gjendjen reale në terren. Sipas Policisë, kampi plotëson të gjitha kushtet e nevojshme për aktivitetet policore, përfshirë qëndrimin e zyrtarëve, trajnimet dhe aktivitetet logjistike, falë 12 projekteve investuese të realizuara në vitet e fundit dhe investimeve të vazhdueshme. Pamjet e publikuara sipas Policisë tregojnë vetëm hapësira jofunksionale dhe të braktisura, të cilat janë zëvendësuar me objekte dhe lokacione të reja, dhe përbëjnë një sulm ndaj institucionit. Policia i bën thirrje mediave dhe qytetarëve të mbështeten në burime zyrtare dhe të verifikuara para se të shpërndajnë informacione lidhur me sigurinë dhe aktivitetet e saj, duke theksuar përkushtimin për transparencë dhe profesionalizëm në detyrën e saj.