Policia e Kosovës ka pranuar një donacion me pajisje fitnesi nga Regional Command East (RC-E) – KFOR, konkretisht nga njësia KFOR 35 256TH IBCT në Camp Bondsteel, në kuadër të bashkëpunimit të vazhdueshëm ndërinstitucional. Ceremonia e dorëzimit u zhvillua në Akademinë e Kosovës për Siguri Publike, ku donacionin e pranoi Kolonel Taibe Canolli Brajshori, e cila falënderoi partnerët ndërkombëtarë për mbështetjen profesionale. Ky donacion synon të përmirësojë kushtet e trajnimit fizik për zyrtarët policorë dhe personelin në trajnim, duke e konsideruar përgatitjen fizike si një element kyç për rritjen e gatishmërisë operacionale dhe performancës profesionale. Policia e Kosovës thekson përkushtimin e saj për avancimin e bashkëpunimit me partnerët strategjikë ndërkombëtarë në funksion të sigurisë publike dhe krijimit të një ambienti të sigurt për qytetarët.