Policia e Kosovës, përmes Drejtorisë për Hetimin e Krimit të Organizuar dhe Krimeve të Rënda – Njësia për Hetimin e Krimeve Mjedisore, ka publikuar një video sensibilizuese me qëllim rritjen e ndërgjegjësimit qytetar për krimet mjedisore dhe pasojat e tyre për shëndetin dhe mjedisin. Videoja informon për format e ndryshme të këtyre veprave penale dhe nxit qytetarët që të raportojnë rastet e dyshuara tek autoritetet kompetente. Policia thekson se do të jetë e përkushtuar në luftimin e krimeve mjedisore dhe në forcimin e kapaciteteve të saj për të mbrojtur shëndetin e njerëzve dhe të ardhmen e gjeneratave të ardhshme. Në njoftim theksohet se një mjedis i pastër është shenjë e një shoqërie të civilizuar dhe se natyra mund të mbijetojë pa ne, por ne nuk mund të mbijetojmë pa natyrën.