Furnizimi me uniforma të reja për Policinë e Kosovës vazhdon të mbetet i pazgjidhur, pasi tenderi me vlerë mbi 11 milionë euro është anuluar sërish për mungesë ofertash të përgjegjshme. Problemet me këtë tender kanë nisur që në vitin 2023, me ankesat dhe pezullimet e shumta nga kompanitë pjesëmarrëse, të cilat kanë kërkuar sqarime dhe kanë kontestuar vendimet e Policisë së Kosovës. Në proces janë evidentuar edhe probleme me certifikatat laboratorike të cilësisë së uniformave, duke çuar në refuzime dhe rishqyrtime të ofertave. Pavarësisht rekomandimeve për anulim dhe ri-vlerësim nga organet shqyrtuese, zyrtarët policorë vazhdojnë të përballen me mungesë të uniformave standarde dhe solemne, duke përdorur veshje të dëmtuara dhe të vjetruara në detyrë.