Policia e Kosovës ka zbuluar armë dhe municion në një shtëpi të braktisur në komunën e Leposaviqit, konkretisht në fshatin Jashanicë, pas pranimit të një informacioni për praninë e tyre në atë vend. Gjatë kontrollit janë sekuestruar një pushkë karabin tip M48, një armë AK-47, një pushkë gjuetie, një pistoletë CZ me dy karikatorë të zbrazët dhe 128 fishekë të kalibrave të ndryshëm. Rasti është njoftuar Prokurorit të Shtetit, i cili ka urdhëruar fillimin e hetimeve për “Mbajtje në pronësi, kontroll ose posedim të paautorizuar të armëve”. Deri më tani nuk ka persona të arrestuar dhe hetimet vazhdojnë.