Pas disa muajsh hetime me metoda proaktive, Seksioni për Hetimin e Narkotikëve në bashkëpunim me Prokurorinë e Tiranës finalizoi një aksion antidrogë në zonën e Ish-Bllokut në Tiranë. Gjatë operacionit të koduar “Night Clubs” u identifikuan dhe u arrestuan 11 persona, punonjës ose administratorë të lokaleve të natës, të cilët dyshohen për shpërndarje të drogave të forta brenda ambienteve të tyre. U sekuestruan rreth 100 gramë kokainë, 2200 tableta ekstazi (MDMA) dhe 11 aparate celularë si prova materiale. Dy persona të tjerë janë shpallur në kërkim, ndërsa një 49-vjeçar u arrestua në flagrancë për shkelje të masës së sigurisë “Arrest në shtëpi”. Hetimet dhe operacionet për kapjen e të dyshuarve të tjerë vazhdojnë nën drejtimin e Prokurorisë së Tiranës.