Në dy ditët e fundit, njësitet policore në rajonin e Mitrovicës së Jugut kanë konfiskuar tri armë në lokacione të ndryshme, duke përfshirë Mitrovicën, Vushtrrinë dhe Skenderajn. Një armë e gjatë u gjet në një automjet në Mitrovicë, ndërsa një tjetër u konfiskua në Vushtrri pas publikimit të një videoje ku një person qëllonte me armë gjatë një ahengu familjar. Në Skenderaj, policia ndërhyri pas pranimit të informatave për të shtëna në një rrugë malore dhe gjeti një armë të shkurtër në brez të personit të dyshuar. Të tre personat e dyshuar janë intervistuar dhe liruar me udhëzim të prokurorit, ndërsa ndaj tyre janë iniciuar raste penale për armëmbajtje pa leje dhe përdorim të armës.