Një incident i rrezikshëm u shmang sot në bregdetin e Vlorës, ku një gomone u pa duke lëvizur me shpejtësi dhe pa drejtues në bord pranë Kepit të Rigonit, përballë plazhit të Llamanit. Policia Kufitare dhe Njësia Policore Detare ndërhynë menjëherë, duke ndaluar mjetin lundrues që paraqiste rrezik për pushuesit dhe mjetet e tjera në det. Drejtuesi i gomones, një 35-vjeçar banues në Orikum, kishte rënë në det gjatë lëvizjes së shpejtë dhe u gjet i dëmtuar në këmbë, por jashtë rrezikut për jetën. Ai u transportua në spital për ndihmë mjekësore, ndërsa gomonia u tërhoq në PKK Himarë për verifikime të mëtejshme. Policia Kufitare thekson angazhimin e saj për sigurinë e qytetarëve dhe turistëve dhe fton për çdo rast emergjence të kontaktohet numri 112.