Në orët e para të mëngjesit të së premtes, Policia Kufitare e Shqipërisë ndërmori një operacion shpëtimi në det, duke reaguar pas sinjalizimit për një mjet lundrues me 11 emigrantë në rrezik, rreth 8 milje larg grykëderdhjes së lumit Vjosë. Me dy gomone, autoritetet lokalizuan dhe shpëtuan të gjithë personat në bord, të cilët janë nga Haiti, Afganistani, Liberia, Pakistani dhe Bangladeshi. Emigrantët u transportuan në tokë dhe aktualisht ndodhen në ambientet e Drejtorisë Vendore të Policisë Vlorë, ku po kryhen procedurat e nevojshme dhe po vijojnë hetimet për rrethanat e ngjarjes. Ende nuk është përcaktuar destinacioni i tyre apo nëse tentonin të kalonin ilegalisht drejt Italisë, ndërsa autoritetet presin të sqarojnë këto detaje pas marrjes në pyetje të emigrantëve.