Gjatë 24 orëve të fundit, Policia Kufitare e Himarës ndërhyri në dy raste emergjente në Gjirin e Filikurit, duke shpëtuar pesë turistë të huaj. Në incidentin e parë, katër turistë – dy suedezë dhe dy britanikë – u bllokuan në det për shkak të motit të keq dhe dallgëve të forta, ndërsa në rastin e dytë një turiste australiane u dërgua për trajtim mjekësor pasi pësoi dëmtime fizike. Efektivët organizuan kërkime përgjatë vijës bregdetare dhe përdorën mjetin lundrues për të lokalizuar dhe evakuuar personat në nevojë në mënyrë të sigurt. Turistët shprehën falënderimet për reagimin e shpejtë dhe profesional të Policisë Kufitare, e cila vazhdon të jetë në gatishmëri për të ndihmuar qytetarët dhe vizitorët në çdo situatë emergjente.