Njësia Task Forcë e Policisë Kufitare Jugu ka ndaluar një automjet me targa serbe që kishte hyrë ilegalisht në Kosovë, duke kapur 275 copë pajisje elektronike për avullim (VEP) të kontrabanduara. Automjeti u ndalua në magjistralen Bujanocë–Gjilan, ndërsa drejtuesi i tij, shtetas serb me inicialet H.L., nuk posedonte dokumentacion për mallrat. Mallrat e sekuestruara përfshinin marka të ndryshme si CROWN Bar, VOZOL dhe AIRMEZ Fox, me një vlerë tregu rreth 5,325 euro. Pas konsultimit me prokurorin, i dyshuari u lirua në procedurë të rregullt, ndërsa mallrat iu dorëzuan Doganës së Kosovës për veprimet e mëtejshme ligjore. Policia riafirmoi angazhimin e saj për luftimin e kontrabandës dhe veprimtarive ilegale që dëmtojnë ekonominë dhe interesat e qytetarëve të Kosovës.