Policia e Kosovës në Ferizaj ka kërkuar bashkëpunimin e qytetarëve për identifikimin e një personi të dyshuar për veprën penale “lëndim i lehtë trupor”. Ngjarja ka ndodhur më 10 dhjetor 2025 në rrugën “Ahmet Kaçiku”, pranë qendrës tregtare The Village – Shopping & Fun në Ferizaj. Me autorizim të Prokurorit të Shtetit, policia ka publikuar fotografinë e të dyshuarit dhe ka bërë thirrje që kushdo që ka informacion të kontaktojë numrin emergjent 192, stacionin policor më të afërt ose të përdorë aplikacionin digjital “Lajmëro policinë”. Autoritetet kanë garantuar se të gjitha informacionet do të trajtohen me konfidencialitet të plotë, duke theksuar rëndësinë e bashkëpunimit për zbardhjen e rastit dhe sigurimin e rendit publik.