Drejtoria Rajonale e Policisë në Mitrovicën e Jugut ka nisur një fushatë vetëdijësuese me moton “Ta ndalojmë së bashku”, për të rritur ndërgjegjësimin mbi dhunën në familje. Gjatë fushatës, zyrtarët policorë shpërndajnë materiale informuese dhe komunikojnë drejtpërdrejt me qytetarët për format e ndryshme të dhunës, si fizike, psikologjike, emocionale, seksuale dhe ekonomike, si dhe mënyrat e raportimit. Policia thekson se dhuna në familje është një vepër penale dhe kërkon reagim të menjëhershëm, duke ftuar viktimat të kërkojnë mbrojtje dhe qytetarët të mos heshtin. Çdo rast mund të raportohet në numrin emergjent 192, në stacionin policor më të afërt ose përmes aplikacionit “Lajmëro Policinë”, pasi reagimi i shpejtë mund të parandalojë pasoja serioze dhe të shpëtojë jetë.