Policia në Gostivar ka identifikuar tre të dyshuar për sulmin e dhunshëm ndaj dy të rinjve, ngjarje kjo që u bë publike përmes një videoje në rrjetet sociale. Të dy të miturit nga Gostivari dhe një 20-vjeçar nga Shkupi janë thirrur për bisedë zyrtare, ndërsa ndaj tyre do të zhvillohet procedurë e përshpejtuar para gjykatës pas përfundimit të dokumentimit të plotë të rastit. Sulmi ndodhi në orët e para të 2 gushtit në rrugën “Borçe Jovanoski”, ku viktimat u goditën me mjete të forta dhe shkopinj druri. Autoritetet kanë marrë masa për konfiskimin e dokumenteve të udhëtimit të të miturve dhe kanë dërguar njoftim zyrtar për procedim të mëtejshëm ndaj personit të tretë.