Kryeprokurori i Shtetit, Zejnulla Gashi, ka prezantuar prioritetet kryesore për 100 ditët e para të mandatit të tij gjatë një takimi me kryeprokurorët dhe përfaqësuesit e prokurorive në vend. Ai ka theksuar nevojën për veprime të menjëhershme për rritjen e efikasitetit në ndjekjen penale, duke përfshirë hetimet financiare në rastet e korrupsionit të profilit të lartë, krimit të organizuar dhe shpëlarjes së parave. Prioritetet përfshijnë gjithashtu sigurinë e qytetarëve, luftimin e armëmbajtjes pa leje dhe narkotikëve, mbrojtjen e pronës, trajtimin e dhunës në familje dhe mbrojtjen e viktimave. Gashi ka paralajmëruar krijimin e mekanizmave të rinj mbikëqyrës dhe mbrojtës për prokurorët, si dhe forcimin e komunikimit institucional, me qëllim rritjen e efikasitetit, sundimin e ligjit dhe besimin e publikut në institucion.